ମୟୂରଭଂଜ ବିଜେଡିରେ ଗୋଷ୍ଠିକନ୍ଦଳ ବଢିବାରେ ଲାଗିଛି

• ବ୍ଲକ୍ ଅଧ୍ୟକ୍ଷଙ୍କୁ ନେଇ ଗୋଷ୍ଠୀକନ୍ଦଳ ଅଭିଯୋଗ • ଆକ୍ରମଣ ପ୍ରତି ଆକ୍ରମଣ, ଥାନାରେ ମାମଲା ଋଜୁ • ଜିଲ୍ଲା ପର୍ଯ୍ୟବେକ୍ଷକଙ୍କ ହସ୍ତକ୍ଷେପ ଲୋଡିଲେ କର୍ମୀ ଭୁବନେଶ୍ୱର/ବାରିପଦା, ୧୧/୧ : ମୟୂରଭଂଜ ଜିଲ୍ଲାରେ ବିଜେଡିର ଗୋଷ୍ଠିକନ୍ଦଳ ଦିନକୁ ଦିନ ବଢିବାରେ ଲାଗିଛି । ଆଗକୁ ପଞ୍ଚାୟତ ନିର୍ବାଚନ ଥିବା ବେଳେ କରଞିଆ ନିର୍ବାଚନ ମଣ୍ଡଳୀ ଅନ୍ତର୍ଗତ ଠାକୁରମୁଣ୍ଡା ବ୍ଲକ୍ରେ ଦଳ ଦୁଇଫାଳ ହେବା ସ୍ଥିତି ଦେଖାଦେଇଛି । ଯାହା ଏବେ ଦଳ ପାଇଁ ମୁଣ୍ଡବଥାର କାରଣ ହୋଇଯାଇଛି । ଠାକୁରମୁଣ୍ଡା ଠାରେ ବିଜେଡିର ଦୁଇ ଗୋଷ୍ଠୀ ମଧ୍ୟରେ ଆକ୍ରମଣ ପ୍ରତି ଆକ୍ରମଣ ଘଟଣା ଏବେ ଥାନାକୁ ପହଞ୍ଚିଗଲାଣି । ଏନେଇ ୩ତିନି ତିନିଟି ମାମଲା ମଧ୍ୟ ହୋଇସାରିଲାଣି । ଏହି ଅଣାୟତ ସ୍ଥିତିକୁ ସୁଧାରିବା ପାଇଁ ଆଜି ଦଳର ଜିଲ୍ଲା ପର୍ଯ୍ୟବେକ୍ଷକ ପ୍ରଣବ ପ୍ରକାଶ ଦାସ ଏଠାକୁ ଆସିବାର କାର୍ଯ୍ୟକ୍ରମ ଥିଲା । ତେବେ ଗଞ୍ଜାମ ଜିଲ୍ଲା ଛତ୍ରପୁରରେ ଦଳର ଏକ ମିଶ୍ରଣ ପର୍ବରେ ସାମିଲ ହେବାର କାର୍ଯ୍ୟକ୍ରମ ଥିବାରୁ ଠାକୁରମୁଣ୍ଡା ଗସ୍ତ ନକରି ସହ-ପର୍ଯ୍ୟବେକ୍ଷକଙ୍କୁ ସେଠାକୁ ପଠାଇଦେଇଥିବା ସୂଚନା ରହିଛି । ସେପଟେ ସହ-ପର୍ଯ୍ୟବେକ୍ଷକ ଏହି ସ୍ଥିତି ସମ୍ଭାଳିବା ଭଳି ପରିସ୍ଥିତି ନାହିଁ । କର୍ମୀ ଖୋଦ୍ ପର୍ଯ୍ୟବେକ୍ଷକଙ୍କୁ ଖୋଜୁଛନ୍ତି । ସ୍ଥାନୀୟ ଅଞ୍ଚଳରେ ଦଳୀୟ କର୍ମୀମାନଙ୍କ ଅସନ୍ତୋଷ ଓ ଉତ୍ତେଜନା ବଢିବାରେ ଲାଗିଛି । ସେପଟେ ଦଳରେ କର୍ମୀ ଯୋଡି ହେଲା ବେଳକୁ ଏପଟେ ଦୁଇଫାଳ ହେବା ସ୍ଥିତି ସୃଷ୍ଟି ହୋଇଛି । ସୂଚନାନୁସାରେ, ଠାକୁରମୁଣ୍ଡା ଠାରେ ବିଜେଡିର ଦୁଇ ଗୋଷ୍ଠୀ ମଧ୍ୟରେ ବିବାଦରୁ ଆକ୍ରମଣ ପ୍ରତି ଆକ୍ରମଣ ଘଟଣାରେ ଥାନାରେ ଅଭିଯୋଗ ହୋଇଛି । ଏହିଘଟଣା ସହିତ ବିଧାୟିକା ତଥା ଅନ୍ୟକର୍ମକର୍ତାମାନଙ୍କର ନବ ବର୍ଷର ଅଭିନନ୍ଦନ ବ୍ୟାନର ଫାଡିବା ଅଭିଯୋଗ ଘଟଣାରୁ ବିଜେଡିର ଗୋଷ୍ଠୀବିବାଦ କଥା ପଦାରେ ପଡିଯାଇଥିବାର କୁହାଯାଉଛି । ଥାନାରେ ହୋଇଥିବା ଅଭିଯୋଗରୁ ପ୍ରକାଶ ଯେ, ରବିବାର ରାତିରେ ବିଜେଡିର ରରୁଆଁ ସଂଯୋଜକ ତଥା ଠାକୁରମୁଣ୍ଡା ବ୍ଲକ୍ ଅଧ୍ୟକ୍ଷ ପ୍ରଶାନ୍ତ ବେହେରା ଓ ତାଙ୍କ ସମର୍ଥକମାନେ ସ୍ଥାନୀୟ କେତେକ ଛାତ୍ର ଓ ଯୁବ ବିଜେଡି କର୍ମକର୍ତାଙ୍କୁ ଗାଳି ଫଜିତ୍ କରିବା ସହିତ ଜିଲ୍ଲା ବିଜେଡି ପର୍ଯ୍ୟବେକ୍ଷକ ଏବଂ ସ୍ଥାନୀୟ ବିଧାୟିକାଙ୍କ ଉଦେ୍ଦଶ୍ୟରେ ଅଶାଳୀନ ଗାଳିଗୁଲଜ କରିଥିଲେ । ଏହା ସହିତ ବିଜେଡି ଯୁବ ଓ ଛାତ୍ର କର୍ମକର୍ତାମାନଙ୍କୁ ଆକ୍ରମଣ ମଧ୍ୟ କରିଥିଲେ । ଏହି ଘଟଣା ପରେ ୧୦ ତାରିଖ ପୂର୍ବାହ୍ନରେ ବିଜେଡି କର୍ମୀମାନେ ଏକତ୍ରିତ ହୋଇ ବ୍ଲକ୍ ଅଫିସ୍ ଯାଇ ଅଧ୍ୟକ୍ଷ ପ୍ରଶାନ୍ତ ବେହେରାଙ୍କୁ ଏ ସମ୍ପର୍କରେ ବୁଝାସୁଝା କରିବାବେଳେ ପୁଣି ତାଙ୍କ ଓ ତାଙ୍କ ସମର୍ଥକମାନଙ୍କର ଆକ୍ରମଣର ସମ୍ମୁଖୀନ ହୋଇ ପ୍ରତି ଆକ୍ରମଣ କରିଥିବାର ମଧ୍ୟ ଅଭିଯୋଗ ହୋଇଛି । ବ୍ଲକ୍ ଅଧ୍ୟକ୍ଷ ଶ୍ରୀ ବେହେରା ବିଭିନ୍ନ ସମୟରେ କେବଳ ବିଜେଡି କର୍ମୀମାନଙ୍କୁ ଗାଳି ଫଜିତ୍ କରିବା ସହିତ ବ୍ଲକର ଯନ୍ତ୍ରୀ ଓ ସହକାରୀ ଯନ୍ତ୍ରୀମାନଙ୍କୁ ମଧ୍ୟ ଏଭଳି ଅଶାଳୀନ ବ୍ୟବହାର ପ୍ରଦର୍ଶନ କରୁଥିବାର ଅଭିଯୋଗ ରହିଛି । ବାରମ୍ବାର ବିଶୃଙ୍ଖଳିତ ଆଚରଣ ପ୍ରଦର୍ଶନ କରୁଥିବାରୁ ଏଭଳି ଆଚରଣ ପାଇଁ ତାଙ୍କୁ ବିଜେଡି ଦଳରୁ ବହିଷ୍କାର କରିବାକୁ ଦଳ ପର୍ଯ୍ୟବେକ୍ଷକଙ୍କ ଠାରେ କର୍ମୀମାନେ ଦାବି କରିଥିବା ପ୍ରକାଶ । ତେବେ ଏହି ଘଟଣା ବାବଦରେ ଥାନାରେ ତିନି ଗୋଟି ଅଭିଯୋଗ ପ୍ରତି ଅଭିଯୋଗ ହୋଇଥିବାବେଳେ ଏ ବାବଦରେ ଥାନାରେ ତିନି ଗୋଟି ମାମଲା,୩/୨୨,୪/୨୨ ଓ ୫/୨୨ ମୂଳେ ବିଭିନ୍ନ ଦଫା ମତେ ଋଜୁ ହୋଇଥିବାର ଓ ମାମଲାଗୁଡିକର ତଦନ୍ତ ଚାଲିଥିବାର ଜଣାଯାଇଛି । ଦଳରେ ଭଲ ବାତାବରଣ ଆଣିବାପାଇଁ ଆଜି ଦଳୀୟ ଜିଲ୍ଲା ସହ ପର୍ଯ୍ୟବେକ୍ଷକ ଜନ୍ମେଜୟ ଲେଙ୍କା, କରଞିଆ ବିଧାୟିକା ବାସନ୍ତୀ ହେମ୍ବ୍ରମ୍ ଓ ନିର୍ବାଚନମଣ୍ଡଳି ପର୍ଯ୍ୟବେକ୍ଷକ ସାମୁଏଲ ନାୟକ ଠାକୁରମୁଣ୍ଡା ବିଜେଡି ଦଳୀୟ କାର୍ଯ୍ୟାଳୟରେ ବୈଠକ କରିଥିଲେ । ଏଠାରେ ବ୍ଲକ୍ ଅଧ୍ୟକ୍ଷ ଶ୍ରୀ ବେହେରା ପହଞ୍ଚି ସହ-ପର୍ଯ୍ୟବେକ୍ଷକ ଶ୍ରୀ ଲେଙ୍କାଙ୍କୁ ମଧ୍ୟ ବିଶୃଙ୍ଖଳିତ ଆଚରଣ ପ୍ରଦର୍ଶନ କରି କର୍ମୀମାନଙ୍କର ଶରବ୍ୟ ହୋଇଥିବାର ଜଣାଯାଇଛି । ଜଣେ ପୂର୍ବତନ ବିଧାୟକ ଏବଂ ଅନ୍ୟଜଣେ ପ୍ରଭାବଶାଳୀ ଠିକାଦାରଙ୍କ ଭିତିରିଆ ପରାମର୍ଶ ଅନୁସାରେ ବିଧାୟିକାଙ୍କ ରାଜନୈ÷ତିକ ପତିଆରା କ୍ଷୁର୍ଣ୍ଣ କରିବାପାଇଁ ବ୍ଲକ ଅଧ୍ୟକ୍ଷ ଶ୍ରୀ ବେହେରା ଏଭଳି ଆଚରଣ ପ୍ରଦର୍ଶନ କରୁଥିବାରୁ ତାଙ୍କୁ ଅବିଳମ୍ବେ ଦଳରୁ ବହିଷ୍କାର କରିବାପାଇଁ କର୍ମୀମାନେ ଦାବି କରିଥିଲେ । ଏହି ଘଟଣାରେ ଜିଲ୍ଲା ପର୍ଯ୍ୟବେକ୍ଷକ ଶ୍ରୀ ଦାସଙ୍କ ଦୃଢ ହସ୍ତକ୍ଷେପ କରିବାକୁ ଦଳୀୟ କର୍ମୀମାନେ ଦାବି କରିଛନ୍ତି । ତୁରନ୍ତ ଶ୍ରୀ ବେହେରାଙ୍କୁ ଦଳରୁ ବହିଷ୍କାର କରାଯିବା ସହିତ ତାଙ୍କୁ ଗିରଫ କରିବାପାଇଁ ଦଳୀୟ କର୍ମୀମାନେ ଦଳୀୟ ହାଇକମାଣ୍ଡଙ୍କୁ ଦାବି ଜଣାଇଥିବାର ପ୍ରକାଶ ।