ଶ୍ରେଷ୍ଠରେ ନବୀନ, ପଛୁଆ ବ୍ୟବସ୍ଥା

ଲୋକପ୍ରିୟ ମୁଖ୍ୟମନ୍ତ୍ରୀଙ୍କ ରାଜ୍ୟରେ ଲୋକେ ମୌଳିକା ସୁବିଧା ପାଇବାରେ ପଛୁଆ ଭୁବନେଶ୍ୱର : ରାଜ୍ୟରୁ ଆରମ୍ଭ କରି ଦେଶ ବିଦେଶରେ ପ୍ରଶଂସାର ସୁଅ ଛୁଟିଛି, ‘ନବୀନ ନମ୍ବର-ୱାନ୍’ । ଚଳିତ ମାସରେ ଦୁଇ ଦୁଇ ଟି ସଂସ୍ଥା ତରଫରୁ ଲୋକପ୍ରିୟ ମୁଖୟମନ୍ତ୍ରୀ ଭାବେ ନବୀନ ପଟ୍ଟନାୟକଙ୍କୁ ସ୍ୱୀକୃତି ମିଳିଛି । ତେବେ ଦେଶର ସବଠାରୁ ଶ୍ରେଷ୍ଠ ଲୋକପ୍ରିୟ ମୁଖ୍ୟମନ୍ତ୍ରୀଙ୍କ ରାଜ୍ୟରେ ଲୋକେ ମୌଳିକ ସୁବିଧା ପାଇବାରେ ବହୁ ପଛୁଆ ବୋଲି ଦର୍ଶାଇଛି ଆଜିକାର ଅର୍ଥନୈତିକ ସର୍ଭେ ରିପୋର୍ଟ । ଦେଶର ସର୍ବାଗ୍ରେ ଥିବା ରାଜାଙ୍କ ରାଇଜର ଲୋକେ ମୌଳିକ ସୁବିଧା ଟିକେ ପାଇ ପାରୁ ନାହାନ୍ତି! ଲୋକଙ୍କୁ ମୌଳିକ ଆବଶ୍ୟକତା ଯେପରିକି ସ୍ୱଚ୍ଛ ପାନୀୟ ଜଳ, ଘର, ବିଜୁଳି, ସୁରକ୍ଷିତ ରନ୍ଧନ ଇନ୍ଧନ ଆଦି ଯୋଗାଇବାରେ ଓଡ଼ିଶା ସମଗ୍ର ଦେଶରେ ପଛୁଆ । ଏଭଳି ଏକ ନୈରାଶ୍ୟ ଜନକ, ବିଡମ୍ବିତ ତଥ୍ୟ ସାମ୍ନାକୁ ଆଣିଛି ଏହି ରିପୋର୍ଟ । ଆଜି ଲୋକସଭାରେ ଆଗତ ହୋଇଥିବା ବର୍ଷ ୨୦୨୦-୨୧ର ଅର୍ଥନୈତିକ ସର୍ଭେ ରିପୋର୍ଟ । ଗତ ୨୦୧୨ ତୁଳନାରେ ୨୦୧୮ ବେଳକୁ ସ୍ଥିତିରେ ଉନ୍ନତି ଆସିଥିଲେ ମଧ୍ୟ ଲୋକଙ୍କୁ ମୌଳିକ ଆବଶ୍ୟକତା ଯୋଗାଇବାରେ ୪ଟି ରାଜ୍ୟ ଓଡ଼ିଶା, ପଶ୍ଚିମବଙ୍ଗ, ଝାଡ଼ଖଣ୍ଡ ଓ ତ୍ରିପୁରା ସମଗ୍ର ଦେଶରେ ପଛୁଆ ରହିଛନ୍ତି । ଲୋକମାନଙ୍କୁ ମିଳୁଥିବା ମୌଳିକ ଆବଶ୍ୟକତାକୁ ପରିମାପ କରିବାକୁ କେନ୍ଦ୍ର ସରକାରଙ୍କ ଜାତୀୟ ପରିସଂଖ୍ୟାନ ଅଫିସ (ଏନ୍ଏସ୍ଓ) ପକ୍ଷରୁ ମୌଳିକ ଆବଶ୍ୟକତା ସୂଚକାଙ୍କ (ବିଏନ୍ଆଇ)ର ବ୍ୟବହାର କରାଯାଏ । ଅଧିକ ବିଏନ୍ଆଇର ଗୋଟିଏ ରାଜ୍ୟର ଅର୍ଥନୈତିକ ଉନ୍ନତିର ଏକ ସୂଚକ । ଅର୍ଥନୈତିକ ସର୍ଭେ ରିପୋର୍ଟରେ କୁହାଯାଇଛି ଯେ କେରଳ, ଗୁଜୁରାଟ, ଦିଲ୍ଲୀ, ଗୋଆ, ମିଜୋରାମ, ସିକ୍କିମ, ପଂଜାବ, ହରିୟାଣାର ବିଏନ୍ଆଇ ସମଗ୍ର ଦେଶରେ ଅଧିକ ଓ ଓଡ଼ିଶା, ପଶ୍ଚିମବଙ୍ଗ, ଝାଡ଼ଖଣ୍ଡ ଓ ତ୍ରିପୁରାର ବିଏନଆଇ ସମଗ୍ର ଦେଶରେ ସର୍ବନିମ୍ନ । ଅର୍ଥାତ ଲୋକଙ୍କୁ ସର୍ବନିମ୍ନ ଆବଶ୍ୟକତା ଯୋଗାଇବାରେ ଏହି ୪ଟି ରାଜ୍ୟ ଦେଶରେ ପଛୁଆ । ସେହିପରି ହରିୟାଣା, ଗୁଜୁରାଟ, କେରଳ, ରାଜସ୍ଥାନ, ଉତ୍ତରପ୍ରଦେଶ, ବିହାର,ମଧ୍ୟପ୍ରଦେଶ, ଛତିଶଗଡ଼, ସିକ୍କିମ, ଆସାମ, ଅରୁଣାଞ୍ଚଚଳପ୍ରଦେଶ ଆଦି ରାଜ୍ୟ ଗତ ୨୦୧୨ ତୁଳନାରେ ୨୦୧୮ ବେଳକୁ ନିଜ ସ୍ଥିତିରେ ଦ୍ରୁତ ଉନ୍ନତି ହାସଲ କରିଛନ୍ତି ।